Plantun de Prouvènço

Pèr coumpara dos planto d'encò nostre

Salix hastata & Rosa dumalis

Salix hastata

Salicaceae

Nom en français : Saule à feuilles hastées.

Descripcioun :
Lou sause-di-fueio-astado es un pichot aubret que trachis proche di sourgènt e dis aigo de mountagno. Li ramo bruno, rouginello, emé uno ligno lisco dessouto la rusco, soun desplegado. Li fueio, pulèu grando pèr un pichot sause, de 4 à 7 cm de long e 2,5 à 5 cm de larg, soun lusènto dessubre e pas dessouto. Lou pecou èi pichot.

Usanço :
Tóuti li rusco de sause caupon de salicino que douno d'acide salicilì dins lou cors, ço qu'ajudo à abeissa li fèbre.

Port : Pichoto planto lignouso
Taio : 0,2 à 1 m
Fueio : alterno
Tipe bioulougico : Camefite
Cicle bioulougico : Planto renadivo

Gènre : Salix
Famiho : Salicaceae

Ordre : Malpighiales

Coulour de la flour : Blanco
Petalo : ges
Ø (o loungour) enflourejado : 15 à 50 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Jun à juliet

Liò : Sourgènt - Ribo de palun - Prado umido
Estànci : Subaupen
Couroulougi : Ouroufito-Éurasiatico
Ref. sc. : Salix hastata L., 1753

Agufié(-roso)

Rosa dumalis

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier commun.

Descripcioun :
Aquel agufié, Rosa dumalis, trachis dins li relarg mountagnous e roucaious. Douno d'èr à Rosa canina, mai èi bèn mens coumun. Èi mai rabasset, emé de fueio souvènt verdalo e de flour pus acoulourido, roso vivo. La diferènci founso èi de vèire dóu coustat de l'ourifice calicinau qu'èi mai grand (>1/4 de la larjour, vèire la fotò). Aquel agufié-roso, presenta aqui èi Rosa dumalis s.s. (sènso glando sus lou pecou, dènt di fueioun coumpausado e sènso péu souto li fueio).

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.